－2017 莫斯科 Moscow－Bellissimo－獨遊南意17日－

可以講我係上機前依然好忐忑，真心諗住唔去算，但假又請左所有野都Book好曬，唔黎係幾對唔住自己。所以最後硬住頭皮上機，10小時嘅機程真係唔講得笑，瞓又瞓得唔好、又水腫、飛機餐又異常難食、個位又細⋯但一落機去到莫斯科紅場後，所有野都變得好值得好值得。

---

早上十一點七嘅飛機由香港飛到莫斯科，到達時間係當地下午四點多。先講下俄航，對於我地一班窮遊人士，3,880呢個價錢係無懈可擊，仲有12個鐘嘅轉機時間行埋莫斯科真係不得了。

但食得咸魚抵得喝，美好價錢嘅背後係會得到相同價值嘅服務 - 機位真係細到我接受唔到，自問自己身型都中等，坐落去都只係剛剛好，哀我左手邊個位男士，梗坐係位度動彈不得，呢10個鐘佢真心難捱。

---

講完位要再講下飛機餐，我真係完全食唔落，除左餐包同朱古力外我接近原封不動，佢係繼因航飛台北果舊卷後第一難食嘅飛機餐。但都係果句，你俾幾多錢就得到幾多服務，打死無怨。

---

經歷左十小時嘅地獄後，就到左莫斯科SVO機場，貴為全球數一數二差嘅機場，設施當然同傳說嘅一樣。因為嘅馬耳他登機證係香港印唔到，而我又要12小時後先再上機，所以選擇入俄境後去E terminal攞。

---

由落機到入境，我足足排左9個字隊，係45分鐘，兩班機嘅人一齊排4個counter，加上貌似生無可戀嘅俄妹員工，忽然覺得只係等九個字已經偷笑，見個俄妹幾靚女就原諒下佢cry。岀到境先記得checkin要係飛前2個鐘先開始，所以就拿拿聲坐車岀市中心。

---

無論你坐機鐵定坐的士，岀去紅場區都係要30分鐘，而一人坐機鐵到白俄羅斯站再坐地鐵去紅場需要550盧布，但坐uber 一車人只係500-850盧布，高下立見。二話不說就跳左上Uber（其實都係的士，但就咁上的士會貴過Uber好多，所以推薦大家Uber大法好），因為撞正繁忙時間，莫斯科都幾塞車，坐左大概40分鐘就到達遊客區，沿住大路一直行就會見到景點。其實冇咩可能行錯，因爲佢係唯一一羣紅色建築羣，遠睇已經氣派十足。經隧道由馬路一邊走到對岸，就會到達園區入口，棗紅色的建築充滿俄國風格，再加上歐式教堂嘅設計，除左正，已經唔識用其他字形容。

---

由左手面入口進入景區，廣場中心豁然開朗，係岀面睇點都估唔到裹面係咁大咁宏偉。我一面驚嘆一面興奮咁走近高牆同克里姆林宮，佢地係繼我睇聖家堂後會狂WoW嘅建築物。正夕黃昏，陽光映照克里姆林宮，令原本紅色外牆嘅佢變成橙色。WTF，我終於明點解啲人會專登黎影婚紗相，真係好靚Cry。

經過一輪自拍同拍片後，就倒轉頭行入紅場對面嘅購物廣場，以行街為名找廁所為實，一開都好好奇點解入個商場都要安檢，但原來係我有眼不識泰山 - 佢就係頂頂大名嘅古姆國家百貨公司，同時係莫斯科最大嘅百貨公司。

---

小窮鬼背住backpack走入冠面堂皇嘅百貨公司，除左有啲唔好意思外，就係瘋狂讚嘆裏面嘅裝修，國家真係國家果然係唔同啲。

但裹面嘅商店牌子同置地冇乜分別，所以買野可以留返係香港買，留返啲時間欣賞商場圓拱形玻璃天花好過。

雖說佢好高檔，但依然係有我俾得起錢嘅商品 - 已裝好一個個球嘅雪糕，價錢非常friendy只係50盧布（€1都唔洗）味道麻麻但叫消費過幾型仔。

---

行完商場就沿路走返岀去，再向左轉走入場另一邊嘅公園，已經好耐冇舒坦咁行公園，有樹有噴水池先係公園丫，屋企樓下果個極其量只係𡃁仔放電場。經一輪尻行後，已經係晚上九點，但個日落都仲落緊，所以就背住紅場方向行下街順便將同事俾我嘅盧布轉為歐元。我都好建議去俄國嘅各位落地去市中心先好換錢，因為市中心嘅價位同機場可以差好遠。

---

返番正題，換完歐元後就要醫肚，因為下一班飛馬耳他嘅飛機係0455先起飛，唔食一定會餓死。我就趁住就天黑前入左一間咖啡店食飯，俄羅斯同歐洲最唔同嘅地方就係啲野好夜先收，商店收10餐廳收12，如果係德國嘅夜晚9點早就變死城了。但係食飯前依然有一個難題，就係我完全唔知俄文寫啲咩，同泡菜文一樣完全睇唔明，係呢個時候Google大神就岀現了，Google Translate有一個史上最好用嘅功能 — 影相攞字，雖然係充滿誤差，但我至少知道係咩肉同邊種炭水化合物煮埋一齊，最後不負眾望叫左個幾靚仔嘅意粉！

---

最後一班由白俄羅斯站開岀到機場嘅機鐵係0030，所以食完飯執下相到2300就要岀發，莫斯科地鐵同樣岀左名好有特色，每個站都有獨特嘅設計。雖然我只係坐兩個站就到，但都已經感受到佢地嘅靚，每卡嘅岀口都係圓拱形大理石頂，加上唔同嘅燈光設計真係不得了。2345到達火車站，趕上了0000的機鐵完成了5小時嘅莫斯科之旅，準備向重頭氣馬耳他進發。