福岡場 「namie amuro Final Tour 2018～Finally～」Day 2/2
話到明黎追安室，我當然要係福岡市內尋找佢嘅蹤影。福岡真係好愛安室奈美惠，愛到要將整條天神購物街所有外牆廣告板轉曬做佢做樣，如此重要情景當然要去望下啦！
一早起身執好夜晚離開嘅行李，食塊安室牌曲奇就起程了，當日天色唔係太好又落微微雨，令氣溫清涼左好多。由住宿去天神大街只需要15分鐘，因為要將香港Banner移交俾第二場嘅粉絲，所以相約係大街嘅一個商場等。一落巴士就見到一個安室係百貨公司嘅櫥窗岀現了！見到嘅一刻真係超級感動！同時代表尋找安室福岡一日遊正式開始～
將Banner交收好後，就急急腳尋找Starbucks叉叉電，呢個絕對係我去旅行每一日嘅第一個行程，冇杯咖啡我同個世界係連唔到線⋯⋯ 幸好日本Starbucks總會有間係左近，所以就一支箭飛上去。位於七樓嘅美帝咖啡室早已經人山人海，星期日嘅早上有好多日本人坐係度飲咖啡睇書、打稿，盡顯中產嘅風格(#^.^#) 而小市民嘅我則被另一樣嘅吸引眼球：日本期間限定咖啡豆。期間限定都唔係重點，最重要係櫻花特別版！
對於一個要同年報搏抖嘅小職員，三月嘅櫻花就好似傳說一樣，只聞未見(喂你係München咪睇過囉！) 所以每當見到櫻花產品嘅時候都特別興奮。當日Coffee就係呢隻豆啊！所以急不及待地買左杯House黎試下，就連隻杯同Today special板都有櫻花嘅足跡，可見日本幾咁鍾意自己國花。
咖啡到手了，咖啡香味四溢，雖然味道唔夠平時Starbucks House Coffee濃，但飲落去嘅每一下，口腔都有花開嘅感覺，就好似有股能量會由口腔走返岀黎咁，我諗都係因為有其特色，所以豆名叫Spring Blossoms。包裝又咁靚又有掛耳盒裝賣，就成為我今次福岡嘅手信！一口氣買左四包豆兩盒掛耳，好真係好鍾意呢隻豆(;´༎ຶД༎ຶ`)
飲完咖啡，就漫遊下呢個百貨公司，位於福岡市中心嘅PARCO百貨有齊我需要嘅所有野，女裝、書店、Starbucks、藥妝、仲有最重要嘅 — Tower Records！ ‘No Music No Life’ 係呢間record house嘅口號，對我亦然。每次黎到日本都會行佢而且都會有好多收穫，適逢安室到福岡，Tower Records當然唔會放過呢個大好機會，將安室歷年黎所有Single Album DVD Bluray 都放曬係門口，電視機仲播住16-17年嘅Live Style ^_^
今次仲唔係破產嘅好機會？呢間Record接近有齊安室所有演唱會Bluray，然後就手拾幾隻戰利品再行下 —— 同期有我日本最愛樂隊RADWIMPS岀左第21隻Single <Mountain Top / Shape of Miracle>、日本JAZZ天后JUJU岀左第7隻大碟<I>、防彈少年團嘅日巡演唱會Blu-ray<The Wings Tour>......血濺福岡，仲買到有會員卡添❤️😂
一手咖啡一手CD、買到好興奮嘅時候發現，我原來早餐都未食超級肚餓，仲已經一點幾了，今晚又約左人食飯，一定要食啲野先可以再行街。因為PARCO嘅餐廳太平凡，所以先離開百貨公司再去食我好想食好耐嘅Pan Cake!
唔知由幾時開始，去日本嘅香港女仔係一定要食呢種甜品，就算要排2、3個鐘，甚至一天光就要去排都冇所謂，最緊要係食到然後打IG卡😂 係福岡我冇特登去找一間岀名嘅甜品店，反而係因為去找安室告示牌所以發現到呢問鋪頭。
佢主打嘅係今季當造嘅士多啤梨(金泰亨上身)！見到如此誘惑當然狗衝入去啦！然後點左個期間限定嘅招牌菜，其實我落Order嘅時候櫻花姐姐已經有啲驚訝，但我冇理佢，直到主菜上到黎我先驚覺原來係咁大份🙈 好彩我由早上空肚到依家，就算黎兩份我都唔驚你◡ ヽ(`Д´)ﾉ ┻━┻
食飽後就要爭取時間行下地下街，一如日本傳統，最精彩同最抵買嘅野當然就收埋係地下街。
天神地下街係福岡命脈，只要你係遊客就一定要黎，點解？因為佢剛剛開左RINGO！風靡東京同大阪嘅蘋果派店終於降臨福岡，一如RINGO格調，店舖外望入去係完全唔似賣甜品，但走近啲就會聞到牛油嘅香味，就係佢了！係排隊其間後面有兩位香港大叔不停問其實係排隊買乜？！吓？先生s你地排左15分鐘都仲未知？所以我擰轉頭解釋咗一陣比佢哋聽，然後⋯⋯佢地話唔食甜野走左😂 咁得意嘅？如果唔解釋比佢哋聽，佢哋咪一直排落去，然後唔買翻轉頭？話說回來，RINGO限買一人五個，所以想食多幾件就要再黎排隊了！
買好手信再行多陣就到約定嘅食飯時間，餐飯食寿司冇咩特別，最特別反而係去到機場。福岡機場真係包羅萬有，如果你去旅行唔想一袋二袋手信咁行街，咁本人超級推介你去到機場入左閘先好買。由北海道嘅白豬戀人到沖繩嘅紫薯撻都有，當然都有福岡特產明太子啦～最後買到個空姐幫我地寄艙😂🙈
我嘅福岡追安室之旅就完結了！
～完～