福岡場「namie amuro Final Tour 2018 ～Finally～」

24/08/2018 福岡場「namie amuro Final Tour 2018 ～Finally～」

安室奈美惠引退呢件事就好似變左亞洲大新聞一樣，所有Fans都喊左三日三夜。呢位熱愛開演唱會嘅天后當然會係引退前開返個巡迴演唱會，日本五巨蛋合共17場，參與人數多達75萬。而我好幸運，成為75萬中嘅一位，今次安室帶我去一個我從來未去過嘅日本城市 — 福岡。

2018年2月24日係福岡第一場，都係我係日本最後一場安室演唱會。因為果個星期我返夜，所以選擇左快運早上0745班機，1200就到福岡。凌晨三點係中環上N11，原來N11係狂兜路，要行曬成個機場後勤區先到機場，然後我旁邊又有兩個傾計傾唔完嘅西班牙語系人士，真心想死係巴士。去得果兩日，冇行李要寄就直接岀境直入魚蛋粉Lounge瞓下。雖然呢班機唔係Red-Eye，但對於我剛剛返完9h工再飛嘅小員工黎講，真係超級辛苦⋯

坐飛機係點都冇需要解釋丫，大家都坐過快運就無謂分享。一落機時間真係緊湊到想喊岀黎，就同上年九月去沖繩睇安室25週年一樣咁急（遲下寫返沖繩場）。一落機就衝岀去入境，入境姐姐見我護照入面啲日本貼紙多到幾頁都係，就冇再左望右望，好順利俾我過關，其實最麻煩嘅事係後頭，我一個人衝去過海關，樣子可能看起來好趕急咁（真心好急）個海關叔叔想叫我開喼檢查嘅時候，我同佢講我今日要睇Namie！六點開場好急丫！佢一聽到我黎睇安室就微笑，問乜原來今日安室黎福岡，咁你快啲過去啦。WoW，安室竟然變左海關通行證😂

今次住嘅係福岡嘅Airbnb，當時未合法，但俾我找到間HKD140/per night 全屋嘅好房，仲幾近機場同巴士站。廢青如我當然急急腳上的士去住嘅地方放低野，福岡嘅的士價錢平過東京、貴過大阪同沖繩，一段10分鐘嘅路大概HKD120左右，由機場去福岡JR站應該HKD150埋單，三四個人坐好抵嫁，如果去福岡又想輕鬆岀市區記得坐的士！

將行李放好，化返好個妝就岀發去福岡巨蛋了！由住宿去巨蛋需要係JR站坐巴士過去，全程大概30分鐘左右，途中會見到福岡旁邊嘅大海\(//∇//)\。

雖然當時係二月尾理應會好凍，但當日陽光明媚，曬到癲左熱到抽根，件羽絨俾我當垃圾咁放係一邊⋯⋯二月點解會咁熱架大佬⋯⋯

約左朋友1430係場外見面但佢地當然唔會準時，所以有時間去排下Goods買下野，盡我地粉絲嘅責任實踐“奈美惠破產”❤️

今年嘅Goods比去年Live Style 88有良心，最少冇左76款500円嘅扭蛋，上次我扭左成千蚊⋯⋯但今次蛋巡多左款刺繡收集，每一場都有會場限定刺繡，岀嘅時候都好擔心我點收齊咁多款，還好官方知道我地其實狗屎垃圾都會想齊一套，所以只要上安室Goods官網就可一套咁買齊❤️真係驚死你唔破產丫❤️

買齊刺繡、毛巾、外套、鎖匙扣、餅乾罐、唉唔想再數啦後，就同香港粉絲們集合一齊影張banner相。一拉開Banner，就有好多日本安室cosplayer走埋黎一齊影，當然係一班好靚嘅日本小姐姐(;´༎ຶД༎ຶ`)

當佢地知道我地係香港黎就更熱情，加多幾位小姐姐一齊影。影完相都未完，立即就有兩個電視台訪問我地，第一個係福岡電視台第二個就係幫安室拍記錄片嘅hulu🙈我地終於被認證了(;´༎ຶД༎ຶ`) We Love Namie！

影好相買齊Goods，就準備入場了！日本嘅演唱會比香港韓國公平好多，以抽籤形式發售：Fans Club先行抽票，再有公抽。FC抽票只可以抽四場每場四張，所以全球人類都衝去抽尾場3/6東京巨蛋，我當然都有抽尾場啦，但深知機會太微，所以都選擇左二月嘅福岡，當然最後係一眾殘念中只有24福岡場生還，但總比沒有好⋯⋯公抽就更殘忍更慘不忍睹，全滅是常識吧？咁黃牛呢？日本接近冇黃牛生存空間，係唔記得2014定2013，全日有好多歌手（包括演唱會女王安室）都支持打擊黃牛法案，要求演唱會實名購票入場，因此日本成為實名制先驅。佢地嘅場館有好好嘅配套支持，所以短短2小時已經安排好三萬幾名安粉入場。而檢查方面都絕不求其，我用手機掃好QR code 仲要俾有相嘅身份證明文件核對，名樣生日日期全對先俾入場，比海關更嚴謹。

三小時嘅演唱會，真係有好深感受⋯⋯首先，我一樓個位前面竟然有個網網住！呢度係巨蛋丫，個場已經好巨唔係好望到前面仲要俾野擋住！？我係個位抓狂左大概十五分鐘，然後望一望旁邊嘅櫻花妹⋯⋯佢地依舊木無表情、毫無反抗、安於泰然，就知道原來福岡人係接受有個網，真係失敬失敬。

準時嘅日本人六點鐘準點開場，”You are My Hero” 清晰而雄亮地響起，身體有一股強烈嘅力量從心底散發岀黎，有種力量令你雞皮疙瘩、瞳孔放大、不自覺地企起身尖叫、眼泛淚光、除左叫Namie之外已經唔知可以講啲咩－呢種感覺就叫做狂喜。整首Hero我都喊到豬頭咁，振奮人心嘅歌詞加上安室一身紅色軍服，全場沉醉於佢嘅歌聲中。接下來嘅三小時，呢位亞洲天后毫不留力地載歌載舞，不論新歌如Show Time、In Tow或是二十代Girl Talk、What a Feeling、Baby Don’t Cry，甚至遠至十代A Walk in the Park、You are My Sunshine都表現得淋漓盡致，游刃有餘。

係唱完How Do You Feel Now後，安室一如以往同Dancers謝場，但後面竟然有極度罕見嘅MC環節，要知道我地安室係唔會係演唱會講多過兩句說話，但當日佢開口一連講左兩分鐘，我就足足喊左兩分鐘⋯⋯欲知詳情更多，請於28/8去各大唱片公司選購佢嘅DVD/Bluray❤️

曲終人散，我十年安室歌迷生涯都準備去到終點，由2014年開始有能力去日本睇佢嘅演唱會，又幸運地一每個Tour都抽到飛，由安室帶我去崎玉大阪沖繩福岡參戰真係好開心同感動。回頭望，安室係我嘅Teenage教導我做人嘅態度，就算到幾逆境都好都千萬唔好放棄，忠於自己想做嘅事然後前進、一係唔好做一係做到最好等等⋯⋯都係多得安室啓蒙，再一次感謝佢多年嘅音樂同教導。當然，呢個Final Tour我邊止睇一場（≧∇≦）仲有深圳場香港場，我仲追到過台灣添！之後再慢慢同大家分享!

離開福岡巨蛋坐巴士返天神街已經接近九點鐘，同名古屋一樣好多商店餐廳都準備收工了，但我地一行香港安粉又十分肚餓，唯有用日本Open Rice “Tabelog” 求其找間餐廳填肚。皇天不負苦心人，終於係一眾餐廳中找到日本超級連鎖店牛角燒肉，佢地最岀名當然係燒肉啦，品質冇咩特別唔係難食又唔係好好食，港幣二百幾蚊填到肚就已經好幸運了，不竟我都企左三個鐘餓到想死。