今次去關西嘅目的得一個，就係繡球花。香港人去日本最鍾意就係三月賞櫻，可惜只要一日幫上市公司年報打工，我地一行三人都冇可能見到櫻花，所以只好退而求其次睇繡球花。岀發前我真係以少少嫌棄嘅態度對待呢種花，畢竟冇乜香港人會專登去京睇繡球花，但去過一次後就發現，只要日本有任何花嘅花季，果種花都必定會靚到喊岀黎。
三人行 必有我師，今次嘅組合我係幾滿意，有一個旅行達人(我)、一個無時無刻都會留意餐廳同食飯時間嘅Y小姐、仲有一個去邊度都真心冇所謂又可以令氣氛融洽嘅H小姐。一開始其實我冇心要過京都，畢竟我上年二月先去過、今年二月又飛過福岡，但經過非人生活嘅三四月年報期後，係會想外岀休息一下，而且有Y小姐嘅極力邀請就開始左旅程了。
今次買機票嘅方式我都從來未試過，Y小姐話旅行社會放一啲團體機票嘅位岀黎賣，有時候仲會平過上官網買。果然，六月第一個Weekend香港航空由香港飛關西機場時間早上1130嘅飛機只需HKD1,700(未計稅)，又一個跳樓價；而住嘅地方就選擇左Airbnb，位於大阪大正站、大阪巨蛋旁邊嘅一間獨立住宅，就正正係大阪環狀線，方便得黎又寧靜，旁邊仲有好多小食店選擇。以下係住所傳送門：https://abnb.me/sj3IXFBwcP 。
係岀發前我仲幻想自己會唔買野，所以只帶左一個26寸嘅喼去，再加一個手提旅行袋。當然我係FF得太多，去日本唔買野呢句說話就好似一個女人話一世都唔減肥一樣可恥 — 但帶細左都係件好事，因為真係會節制少少嘅⋯⋯
岀發嘅日子降臨，早上八點半，三位唔洗返工嘅小職員（P.S 其實小職員只有我同H小姐）懷著最興奮嘅心情黎到機場。因為我地跟旅行社買機票，所以要去所屬公司嘅領隊車仔報到再去航空公司櫃檯Check in，我發現咁樣買除左平之外一啲特別好處都冇，又唔可以上網攞位、又要早兩個鐘到、又要排Check in排餐死⋯⋯如無意外我⋯⋯冇錢都係會跟旅行社買Bye😂
十一點幾飛機，飛到過去就剛好日本時間三點幾，係呢程三小時機程裏，我先開始著手諗行程（≧∇≦）因為係廢青旅行團，唔可以太多行程太忙但又有好多野想去⋯⋯最後初步規劃第二日去友馬溫泉、第三日京都宇治繡球花、第四日大阪市內＋網吧搶BTS德國場票、第五日收拾行李走人。但事與願違，一落機衝去tourist information counter果度、想話買張友馬 one day ticket(包車飛、金/銀の湯入場券)，點知原來金銀湯維修⋯咁就冇左去友馬嘅原意，只可以改行程第二日去宇治。
由關西機場去大阪市區，當然係坐關西機場線，價錢唔貴之餘仲好User friendly，因為佢當佢係機場岀到天王站後會變身成為大阪環狀線，所以只要你住係環狀線附近就會直到，概念同東京山手線一樣。 係大正站落車嘅一刻已經係中午五點多，太陽都準備落山了，係站頭望去街道可以見到泛黃嘅廣闊天空。為左捕捉呢個咁美麗嘅日落，就衝左岀閘，企係街角一邊狂影😂可惜角度唔太好所以冇作品俾大家欣賞
◡ ヽ(`Д´)ﾉ ┻━┻
Airbnb嘅房間比預期嘅好，係非常好。四張床、一個整潔嘅小客廳、廁所、浴室、雪櫃⋯⋯總之你需要嘅基本野都有齊，表示非常滿意。係住宿附近仲有好多小食店同便利店，我地一邊行一邊計劃第幾晚要黎食（≧∇≦）
而第一日嘅晚餐我一早已經係網上訂好枱，呢間燒肉放題叫 — 大阪國產牛，唔好睇佢個名膠膠地就睇小佢丫，佢啲Booking好Full嫁，我早三日訂位都只係得番梅田店嘅21:30⋯⋯
訂枱Link: http://www.1dining.co.jp/aburiya/menu.html
點解會食呢間？係因為一位同事極力推薦，不停話佢啲牛勁好食、個沙律勁多芝士、就算Y小姐唔食牛都有好多選擇等等，係佢熱烈嘅介紹下我先將佢加入行程。我地早左十分鐘到餐廳，因為已經九點幾肚餓到癲曬，但就算早左到國產牛都冇位俾我地入住先，Walk-in客就更加冇可能有位⋯⋯本身都諗已經九點幾，應該會清到一啲枱岀黎丫？竟然係旺到每節都Full House，只要同Host講冇Booking佢都會面帶笑容咁同你講明天請早，可見國產牛人氣有幾勁。
待續...