－Bellissimo－獨遊南意17日行程編排－序－

Michelle Ruth
Feb 15, 2017
4 min read

Bellissimo － Very Beautiful

有人問我一個人去驚唔驚，雖然係歐洲住過一陣子，大概知道佢地嘅脾性同習慣，但依然係有少少驚；

有人問我點請假，其實請十日長假係好需要勇氣－特別係請Nopay嘅時候，銀包需要無比嘅勇氣；

有人問我點解安全嘅地方唔去（西德瑞士奧地利）係都要南下入西西里，係因為上面嘅都已經睇夠，乜乜乜教堂乜乜乜廣場中世紀至當代博物館到十九二十二十一世紀建築都睇到想嘔了 T_T，所以南意嘅希臘神殿古蹟係眾望所歸；

有人問我去完南意仲有咩歐洲國家想去，當然係東歐三小國，但呢啲等遲啲先諗，真係要遲多一兩年；

有人問我一條終極問題，你每一百日一個旅行，點儲錢第時用？第時？第時咪就係一百日後囉，呢啲咁辛苦嘅地方當然要後生嘅時候去啦，唔通等老左冇氣冇力先行上龐貝火山？你話係咪？

講到呢到一定會有人對我為之則目，條女有冇咁串？咩叫乜都睇夠？咩叫都去過唔再去？其實呢個真係事實黎 ╮(╯▽╰)╭，試諗下你去一個100日嘅歐洲旅行，一開始當然會覺得慕尼黑嘅聖母主教堂、巴黎聖心堂、科隆大教堂到巴塞Gaudí 聖家堂，外面建築好宏偉，裏面interior design既堂皇又典雅－但去到三四十日後，威尼斯聖馬可大教堂其實都差不多丫、羅馬大大小小嘅聖堂都係咁樣、馬德里聖方濟教堂都係果種建築。睇到等六七十日後，就已經教堂而不入，連聖堂門口嘅相都唔想影一張 (._.)

自從去完上一次長征後，我就發誓下次去歐洲一定要睇比教堂更特別、更加為人不熟悉、更多港女冇興趣睇嘅建築物－希臘神殿。記得2014年7月，我去左雅典Athena Nike「勝利女神神廟」（當我同人講Nike其實係代表勝利女神嘅時候，仲俾人覺得我 9up! ）、太陽神神殿、意大利萬神殿同古羅馬遺跡時，有好多野都睇唔明，點解會咁起？呢個係咩神？呢個神管咩嘅？佢係邊個神個仔？一大堆問題但冇人解答得到我 (･_･;) 自此以後，我就知道去睇呢一類古蹟前係需要有一定嘅神話／古希臘建築史知識支撐先會識得欣賞（好老實講，就算普通香港人行入歐洲教堂，都唔會有足夠嘅聖公會／基督教／歐洲建築史知識去欣賞），所以接下來幾篇嘅編排文章都會有神話同歴史資料蒐集（≧∇≦）包保悶到抽曬根（≧∇≦）

有人問我點解唔去希臘睇神殿，要去南意睇？以我歷史考試得19分嘅知識，希臘曾經俾羅馬帝國打到七彩，好多異教神殿（除聖公宗三為一體的神外，其他神明都會被視為異教偶像）都俾人打到爛曬，班友仔仲偷左唔少殘骸返意大利，因此希臘嘅古蹟我總係覺得好唔完整（最好就係先去雅典睇左剩餘嘅古蹟殘支part1同地理位置，然後返意大利羅馬睇埋殘支part2，咁就完整）。相比起雅典，西西里島可以算係比較幸運，雖然神殿教堂同大大小小嘅劇場都經歷過不同戰役洗禮，但摧毁程度遠遠比雅典低，古蹟嘅完整度係足以俾人FF到古時嘅人係點生活點拜祭。所以睇希臘歷史除左去希臘雅典外，西西里島都係一個好選擇。

好啦，講左一大堆廢話，係時候要返主線。

今次我將會用17日遊南意，唔好以為日子好長有好多時間，其實真係攝牙罅都唔夠，而且唔好忘記坐飛機已經用左我兩日( ･᷄ὢ･᷅ ) 所以要捉緊時間去到幾多地方得幾多 ( ̀ ⌄ ́)

而六月至八月真係一個遊歐嘅好時機，首先係天朗氣清，太陽真係不留情面咁曬落黎，沙灘太陽大海，不得了 \(//∇//)\ 加上日長夜短無敵時間－係我記憶中，七月巴塞同雅典嘅日落時間係晚上九點 (#^.^#) 真係可以玩足12小時嫁！！

今次我會從香港坐俄羅斯航空去Malta (馬耳他)，而呢一程飛機嘅價錢真係令我驚喜不少，本身俄航已算平價航空公司，因為航班唔太密、有時又要等好耐先轉機（今次我去程要等11小時先係莫斯科轉到機，用上25小時先到達目的地(･_･; ），所以價格不高而且經常有優惠。本身我都一直有用Zuji 留意機票價位，一直都係四千五左右，我都預左俾差不多嘅價錢買機票。但就係請完假嘅第二日，奇蹟就岀現了！由HKD4,500搖身一變為HKD4,081 (⊙v⊙)，用埋推廣嘅信用卡再減做HKD3,881 (⊙o⊙)。買完嘅一刻我一直懷疑自己係咪買錯左地方定買左單程定發緊夢（≧∇≦）？平到自己都接受唔到（笑），相信我已經開左一個好頭，接下來嘅行程要加油（≧∇≦）

－序完－