－馬爾他 Malta－Day2－獨遊南意17日－
- Michelle Ruth
- Jun 21, 2017
- 4 min read
『我想説馬爾他 “是我擁有快樂回憶的島嶼”』
－Queen Elizabeth ll (The Crown, Episode 8, Netflix 2016)
馬爾他是意大利國靴子、靴尖低下的一個小島國。她是地中海的一顆珍珠，擁有最藍最清澈的大海，同時擁有最遠古的希臘歷史遺跡。全國面積只有316平方公里，面積比香港管轄範圍更細小。
（原諒我生活照影得少，所以睇住字先CRY)
早上四點多嘅飛機，由SVO岀發到馬耳他，由0030等到0455先上機，候機室全程冇位瞓又光又嘈，哀我已經有35小時冇瞓覺。而整程飛機只得我一個亞洲人，呢一個著10cm高跟鞋闊腳褲背backpack嘅backpacker就成為全場焦點XD
Malta有自己嘅航空公司，飛機同HK Express飛東京嘅差唔多大，但坐位嘅闊度竟然比俄航嘅大，四小時機程包一支水同一個麵包，都算幾人道。瞓下醒下就到左傳說中嘅島國 - 馬耳他（馬爾他）。馬耳他同香港相比，氣溫差不多但馬耳他就更乾燥清爽，早午晚嘅溫差有明顯分別，特別係清晨時份嘅風係份外嘅冷。落到地後有幾樣野令我好驚訝：
1. 我買嘅泰國世界卡係馬耳他係報廢嘅，完全收唔到，有見及此我建議用唔到嘅各位可以係機場嘅Vodafone買張卡，要同職員講您唔需要用電話淨數據（如果要埋電話就會貴啲，而我就買左7Day-1GB計劃，齋聽都知我呢個用量皇唔會夠用，所以佢有個官方app可以係app買GB嘅，€5/1GB 自己睇住用。
而下載官方App時我都岀左少少意外，貴為一個果粉你知道App Store係有分地區，而HK地區係下載唔到My Vodafone Malta，所以你需要一個亞爾巴尼亞嘅AC，申請詳情可以問Google大神。除左app外，當1gb/3gb嘅數據用盡嘅時候就sand一個STOP1GB/STOP3GB嘅SMS去16200度，然後再去app度充值。
2. 香港人黎Malta有福了，因為所有制式都同香港一樣。電插頭係三腳嘅、右軚車、英文為官方語言，係溝通上完全冇問題，接近係無縫接軌。
3. 唔洗擔心冇野好食，除非你唔食西餐，整個Malta都係食英倫同海鮮為主，早餐不外乎All Day Breakfast 同 Egg Benedict呢啲港女最愛，然後中午餐食下三文治食下海鮮，又平又好食。
因為機場嘅Vodafone要九點先開，我又係機場傻仔咁坐左兩個鐘。電話卡買好後就準備坐巴士岀市區，因為Airbnb 要下午兩點先可以Check in，所以我去左一問叫UBistrot嘅Café Shop坐到夠鐘為止。
Address: Balluta Bay SLM 1856 St Julians, Malta
已經有兩三年冇咁遊閒過，唔趕時間、冇人催你走、冇壓力咁齋坐、寫下遊記飲下咖啡望下鬼仔又一日。本身諗住食個午飯，差啲忘記自己其實係早上落機得早餐。
因為Malta俾英國統治過同時又有好多英國人黎旅遊（淨聽口音真係一街都係英國人）早餐都特別英倫，All Day Breakfast 不在話下，價錢大概係€8€9左右，同香港價錢差不多，淨係質素同店員嘅友善都值回票價。與此同時，歐洲嘅咖啡真係唔同啲，可能因為近義大利，味道特別香濃，好飲到喊岀黎。
打完俄國遊記後都已經一點多，一個10cm高踭鞋闊腳褲又喼又backpack真係有啲揦手唔成勢，還好我仲淨餘一絲氣力，成功將自己推上山LOL 係我心目中，房東係一個富戶，佢係Malta有好幾間屋同房，因為貴人事忙是日東主不在，所以由House Keeper同我交收鎖匙。（歐洲係有住宿嘅城市增值稅，所以要先交低€2／一個人，然後對方會交一張政府收據俾你）搞掂曬正經事後Keeper就為我介紹全屋嘅公用地方、洗衫房、廁所、廚房等等地方。
而其實五日嘅Malta旅行都有一個友人同行，所以除開所有野都唔會好貴，但我會講，去旅行要小心選隊友(´･_･`)
等埋隊友到，就岀發去Malta第一個景點 —— Mdina舊城區。
其實Malta嘅景點都分得幾散，一個景點去一個景點大概要40至60分鐘。整個Malta嘅公共交通工具只有巴士同船，所以對於我呢個日日坐巴士返工放工嘅人係完全冇問題，相反荷蘭隊友就嘈之巴閉開口埋口講冇地鐵幾唔方便上車落車幾麻煩等等，聽到老娘心都煩。
如果你係一個唔中意坐巴士嘅香港人，我非常建議你揸車，如果唔識揸又唔中意坐巴士但又要去Malta？咁你行路啦 ==
（巴士資料下回提供）
途中經過郊區，其實呢個國家都幾純樸，冇乜摩登同電子野，兩層平房加一片田就已足夠生活。都係簡單好簡單好。
近60分鐘後就到達Mdina（舊城區），呢一個古舊嘅城區只係住左二百幾人，但遊客就有好多，而且仲吸引好多新婚夫婦黎搞結婚酒會。
米黃色嘅樓房配上不同顏色嘅大門同窗戶露台、英國留下嘅紅色郵箱、莊嚴嘅聖保祿主教堂、總會有特別景色嘅轉角冷巷⋯⋯每個地方每個角落都係景點，都可以成為相片嘅主角，拍到相機嘅電用盡就轉用眼睛記錄－漫遊古城永遠都係我嘅最愛。
行完古城都已經八點多，太陽先開始落山，整個日頭足足有十二個小時！經過一小時回程巴士返到St. Julian，同時代表整整77小時嘅清醒狀態終於完結，可以安心瞓一覺了！Day 3一定會更好嘅姐，係咪丫哈姆太郎？（比卡！）
Komentarze