－京都編排意識流－ 1 －

Michelle Ruth
Feb 9, 2017
3 min read

係要講關於我編排京都旅行過程前，想先同大家介紹一個文學寫作手法－「意識流」。跟據一個非著名嘅文學研究人員（即係我）解釋：

“「意識流」是源自心理學的一個概念，代表人類的思想如同河水般，是流動的、不會暫停、不斷變化和有着不受限制的特性。意識流同時也是一個文學的寫作手法，作者通常會用於描寫文章角色的內心思考的過程。雖然人類的意識十分複雜，但文章中整段意識流文字並非雜亂無章，而是散中有序，文章會按照人物所經歷的事和不按照固定的時空順序，或事件發生過程來隨機出現不同的感覺、回憶、思想、聯想等等，互相之間會有一定的關係。”

其實簡單啲講，意識流嘅文章係一堆似有序非有序嘅文字，係需要讀者反覆閱讀同思考先會明白作者嘅意思，即係終極嘅我手寫我心同 1999。即係我有機會會寫到好意識流即係我有機會會寫到好1999，敬請留意(XD)。

而每個人去旅行都有唔同嘅習慣，係度我簡單介紹下我去旅行嘅習慣先：

我習慣一個人旅行－好多女仔都好怕一個人，怕一個人睇戲一個人行街一個人食飯。但其實一啲都唔可怕，自從2014年首次一個人去東京後就發現單獨(毒)外遊嘅收獲遠遠比想象多，特別係交朋結友方邊特別有利；
只要安全到達目的地，坐咩平嘅航空公司都OK －咖喱航空公司、RYANAIR、S7......只要飛到去我就會坐，就算整個過程有幾辛苦/難頂；
Hostel 永遠都都係首選 (要識得好好保管自已財物)，其次為Airbnb；
嘗試食當地人常食嘅野－的確旅行係應該要食好野，但感受當地文化都好重要！

我就係跟據呢啲習慣編排自己嘅行程，FYI。

基本資料

目的地：京都大阪

旅行日期：23／2／2017－26／2／2017

航空公司：Peach

酒店：Piece Hostel Kyoto

行程：未編排好（完成度 - 20%）

Day 1 : 0530: 大阪關西空港落機

Day 2 :

Day 3 : (大阪) 1700-2100: namie amuro LIVE STYLE 2016-2017

Day 4 : 2030: 大阪關西空港落機

今次京都之旅得以成行，主要目的係要睇安室奈美惠嘅演唱會，除左呢一個節目外，就冇諗過其他要去嘅地方。由於飛機落機嘅時間好早 (0530)，因此我考慮過第一日：

－關西空港落機 ➡️ 姬路城(0800-1200) ➡️ 京都(1200-0000)

係時間方面本身已經好無敵，最少坐去姫路城嘅JR六點就有，諗住咁早去到實冇人排隊實冇死。然後再有朋友介紹我去埋友馬溫泉，因為姬路同友馬只係幾個JR站嘅距離，去埋都不為過，然後行程就改為：

－關西空港落機 ➡️ 姬路城(0800-1200) ➡️ 友馬溫泉(1200-2100) ➡️ 京都(Check In)

作為日本三大溫泉嘅其中一大（三大溫泉分別為：草津溫泉、友馬溫泉及下呂溫泉），溫泉酒店當然琳琅滿目。但作為一個獨遊人士，住一晚溫泉酒店嘅消費實在太高，因此打消左一泊兩食嘅諗頭(根本就冇萌生過好冇🙄)，轉攻為一食幾個鐘湯。好多溫泉酒店其實都有類似walk in浸幾個鐘溫泉嘅套餐，仲有啲包埋一食。至於係邊度有介紹同預約，就可以去呢個網站睇下：http://onsen-ryokan.hk/ryokan/location/arima-hot-spring

嘻，見我淨貼Link冇後續，就知我放棄左呢個計劃。唔可以講我完全放棄左，只係暫時擱置。是咁的，當我滿心歡喜將呢一日嘅行程交俾我一個好友("O姐") 睇後，O姐只留左一句「唔好再辛苦啲？你之前果日係收九點去機場嫁八婆！」我就恍然大悟，係喎，我冇乜點瞓嫁wo……

－關西空港落機➡️京都

所以最後到今日為止都係還原基本步，毫無進展可言😂惟有聽日再諗下✌🏻